Discurso Rey Willem-Alexander durante Conmemoracion Nacional pa Historia di Sclavitud dia 1 di juli 2023 den Oosterpark na Amsterdam
Dama- y cabayeronan, aki den Oosterpark, riba Museumplein, na Sürnam, na e parti Caribense di nos Reino y na tur parti di mundo cu ta mirando.
“Binnen der Stadt van Amstelredamme ende hare vrijheydt, zijn alle menschen vrij, ende gene slaven.” (Den Ciudad di Amstelredamme tur hende ta liber y ningun no ta catibo)
Asina e reglanan oficial di 1644 ta bisa.
Hunto cu boso mi ta para aki den e ciudad cu pa siglonan caba ta stima libertad ribatur cos.
E capital di un pais cu historicamente cada bes di nobo a lucha contra tirania y opresion.
Pero loke cu den e ciudad aki y den e pais aki tabata logico, no tabata conta pafo di nos fronteranan.
Aki sclavitud tabata prohibi. Na otro banda di lama no.
Di tur e formanan cu ta trata falta di libertad, sclavitud sigur ta esun di mas ofensivo, esun di mas denigrante, esun di mas inhumano.
Mira un prohimo como mercancia cu bo por dispone di dje manera bo kier. Como un herment sumiso pa hasi ganashi cune. Cu bo por mara na cadena, bende, marca cu hero cayente, morcha, castiga, te asta mata sin ricibi castigo.
Ultimo tempo La Reina y ami a hiba hopi combersacion, na Hulanda y riba e islanan den e parti Caribense di Reino. Nos a papia cu personanan cu tin nan rais na Sürnam y cu personanan tambe cu tin conexion cu Indonesia. Bou di nan, personanan cu tin cu djis bai tres generacion atras pa tin un miembro di famia cu a nace den sclavitud.
Nan a splica nos bon cla cuanto dolor tin ainda den e vena capilar.
Danki na trabou di investigadonan pasiona, nos sa cada biaha mas di e pasado di sclavitud Hulandes. Nos sa cu a transporta mas di 600.000 hende riba barconan Hulandes for di Africa a traves di Oceano Atlantico pa bende nan como catibo of usa nan riba plantashi. 75.000 di nan no a sobrevivi e crusamento di laman. Nos sa tambe di e comercio di sclavitud extenso den direccion oost, den teritorionan bou dominio di VOC. Y nos sa di e atrocidadnan contra e poblacion indigeno den e colonianan.
Pero tin tambe asina hopi cos cu nos no sa. Den e archivonan mayoria biaha ta traspasa e sifranan steril. Nan ta mustra nos e datonan dor di e brel di e tenedo di buki. Pero e bosnan di esnan sclavisa a bula bay cu biento. Apenas nan a laga marca atras.
Mi ta puntra mi mes: kico e hendenan aki tabata sinti. Ranca for di nan comunidad. Separa di nan cultura, nan ritonan, di e suela unda nan antepasadonan tabata biba. Kico nan tabata pensa durante e biahe, bosha riba otro den espacionan mal ventila, e hombernan mara na cadena, na par. Kico tabata pasa den nan mente riba e marshenan di catibo bou di e miradanan cu tabata inspecta nan di e comerciantenan, manera nan no tabata sernan humano, sino bestia. Y kico nan tabata experencia ora di tende e barinan di kawina of tambu, nan propio musica cu por a resona solamente den scondi?
Ta impresionante cu no ta poco di nan tabatin e forsa pa rebeldia, aunke hopi biaha tabata den nan curashi di desesperacion. Guerrilleronan di resistencia manera Boni, Baron y Joli-Coeur, for di e areanan di selva y moeras extenso na Sürnam, tabata reta e sistema inhumano di sclavitud. Nan heroismo – y di hopi otro – ta testigua di orguyo y forsa cu no por a ser kibra.
Masha poco biaha a traspasa bos di un guerrillero di libertad di color na nos, pa medio di fuentenan scirbi. Manera bos di Tula, e lider di e rebelion di 1795 na Corsou. Cinco luna pasa nos tabata cu nos yiu muhe mayor na e sitio unda e tabata biba y traha: e tempo ey plantashi Knip.
Ki rasonabel y humano e palabranan di Tula ta zona den nos oreanan moderno. El a apela na e idealnan di Revolucion Frances y na igualdad di tur ser humano, sin importa nan color. “Nos no kier haci niun hende daño”, el a bisa. “Nos no ta desea nada mas cu nos libertad.”
E contesta di autoridad competente tabata bruto y sin misericordia. Como castigo a mutila Tula y a decapit’e.
Nos ta carga crueldad di e pasado di sclavitud cu nos. Awendia ainda nos ta sinti su consequencianan den racismo den nos sociedad.
Riba 19 di december aña pasa Prome Minister, na nomber di gobierno Hulandes, a pidi disculpa pa e hecho cu den nomber di Estado Hulandes, pa siglonan largo, a converti sernan humano den mercancia, a explota y maltrata nan.
Awe mi ta para aki boso dilanti. Como Rey y como parti di gobierno, awe mi mes ta pidi disculpa aki. Ami ta experencia nan intensamente cu curason y alma.
Pero pa ami tin ademas un otro dimension personal tambe.
Comercio di catibo y sclavitud ta ser reconoce como un crimen contra humanidad. E stadhouder- y reynan di Cas di Oranje-Nassau no a haci nada contra esaki.
Nan a actua den e cuadro di loke tabata considera legalmente permiti. Pero e sistema di sclavitud a ilustra con inhusto e leynan ey tabata.
Segunda Guera Mundial a siña nos cu bo no por sconde te den extremo tras di ley, ora sernan humano ta keda reduci na bestia y laga na merced di esnan na poder.
Na cierto momento e obligacion moral pa actua ta crece. Mas aun como cu sclavitud tabata estrictamente prohibi aki na Hulanda Europeo. Loke cu den e colonianan y den comercio otro banda di lama tabata ser considera normal y tabata ser practica y promove na gran escala, no tabata permiti aki. Eynan e cos ta perta.
E investigacion independiente cu mi a dicidi di laga haci, lo tira mas claridad riba e rol exacto di Cas di Oranje-Nassau den historia colonial y sclavitud. Pero pa e falta obvio di actuacion contra e crimen contra humanidad aki, awe, riba e dia aki cu nos ta conmemora hunto e pasado di sclavitud Hulandes, mi ta pidi pordon.
Mi ta realisa mi mes hopi bon cu no ta tur hende tin e mes sentimentonan relaciona cu e conmemoracion aki. Tin habitante di Hulanda tambe cu ta haya exagera cu ta pidi disculpa asina tanto tempo despues di abolicion di sclavitud. Toch den gran mayoria nan ta sostene e lucha pa igualdad di tur ser humano, sin importa color of descendencia cultural.
P’esey mi kier pidi boso: habri boso curason pa tur e personanan cu no ta presente awe, pero cu si kier traha hunto cu boso na un sociedad den cua tur hende por participa plenamente. Respeta cu tin diferencia den e manera cu ta experencia algo, den descendencia y capacidad di imaginacion.
Durante e combersacionnan cu La Reina y ami a tene cu descendientenan di esnan sclavisa, un di nan a bisa: “nos mester libra nos mes di e mentalidad corumpi ey. Tin mag di comete eror.” Un otro persona a bisa: “laga nos brasa e incomodidad.”
No ta existi un copia pa e proceso di curacion, reconciliacion y recuperacion. Hunto nos ta subi un teritorio nobo. Laga nos sostene y brasa otro!
Awe ta sesenta aña pasa cu un grupo di Hulandes Surinameño a pasa den sentro di Amsterdam cu pancartanan riba cua tabatin para ‘Ketie Kotie fri moe de’. Na a sende e candela di conmemoracion cu awe nos ta mantene cende.
Esaki ta un dia importante pa tur hende cu tin conexion cu Sürnam, esnan tambe cu nan antepasadonan a yega e colonia como trahado di contract.
Mi ta spera cu e descendientenan di esnan sclavisa y di esnan cu mester a traha forsa na otro partinan di mundo, ta sinti nan mes inclui den e encuentro aki awe. Cu nan tambe ta sinti cu ta scucha nan. Personanan for di e parti Caribense di Reino. Y e tantisimo Hulandesnan cu tin conexion cu Indonesia y cu ta carga hunto cu nan e dolor di inhusticia grandi di den pasado.
Nos tur tin nos propio historia familiar. Nos propio emocionnan. Nos propio tradicion cultural cu ta duna guia. Nos ritonan cu ta consola nos, simbolonan cu ta encurasha nos, palabranan di sabiduria cu ta resona den nos curason.
Tur e tradicionnan ey ta valioso y merece respet. Pero laga nos como un continuacion logico di esey, extende nos mannan na otro y hunto traha riba un mundo sin rasicmo, discriminacion y explotacion economico.
Despues di e reconocemento y disculpa nos por traha hunto riba curacion, reconciliacion y recuperacion. Di manera cu finalmente nos tur por ta orguyoso di tur loke nos ta comparti. Y nos por bisa:
Ten kon drai
Tempo a cambia
Den keti koti, brada, sisa
A kibra e cadenanan, rumannan,
Ten kon drai
Tempo a cambia
Den keti koti, fu tru!
A kibra e cadenanan, di berdad!