Presupuesto di Aruba, Corsou y Sint Maarten no mester ta balansa den 2022
Aruba, Corsou y Sint Maarten no tin mester di cumpli den 2022 tampoco cu e normanan presupuestario. Asina Conseho di Minister di Reino, caminda e cuater paisnan hunto ta discuti asuntonan di Reino, a dicidi awe. Esey ta nifica cu dentro di cierto cuadro, nan por saca mas placa cu ta drenta.
E reglanan presupuestario di e paisnan ta legalmente stipula. A palabra cu Aruba, Corsou y Sint Maarten ta percura pa un presupuesto balansa. Como consecuensia di e pandemia di Corona mundialmente esaki no a logra anteriormente den 2020 y 2021.
E paisnan e tempo ey a pidi y a haña aprobacion pa desvia di e palabracionnan. E pandemia persistente y tur consecuencia como resultado, ta pone cu e paisnan atrobe ta pidi permit pa desvia di e rekisitonan stipula. Nan a bolbe haña e aprobacion ey.
“Mi ta contento cu hunto cu e paisnan nos por a logra yega na e palabracionnan aki”, asina Secretario di Estado Alexandra van Huffelen di Relacionnan den Reino ta bisa.
Hulanda a brinda e paisnan ayudo cu mas of menos un miljard euro na fiansa di emergencia. Constantemente ta duna sosten tambe pa combatimento di COVID-19. Banda di esey Hulanda a yuda cu por ehemplo paketenan di cuminda.
Aruba
Aruba a pidi Conseho di Minister di Reino permit tambe pa por elimina gradualmente e cortamento di 12,5 porciento den salarionan, un di e anterior condicionnan palabra pa sosten di emergencia. Conseho di Minister di Reino no a bay di acuerdo cu esey, entre otro pa motibo cu Aruba ainda ta haci apelacion riba fiansa di sosten di emergencia y no tin un presupuesto balansa. Loke si a palabra ta cu Aruba lo bin cu proposicionnan pa duna e reduccion di salario un otro contenido. Mas aleu ta studia hunto cu e paisnan bao di cua condicionnan riba termino por elimina gradualmente e cortamento den salario.