Secretaria di Estado Alexandra van Huffelen ta duna espacio pa elimina 12.5% di reduccion di salario
Secretaria di Estado pa Relacionnan di Reino kier crea espacio pa paisnan den reino elimina e reduccion di salario di 12.5%. E reduccion di salario a wordo intruci na mitar di 2020 pa motibo di e pandemia di Corona simbolisando solidaridad na e mercado y tabata tambe un esfuerzo pa baha gasto di e gobiernonan. Awor cu e gastonan di bida diario ta sigui subi a bira tempo pa reevalua e 12.5%, e Secretaria di Estado ta expresa.
Secretaria di Estado Van Huffelen: “E ultimo periodo e gastonan di bida a subi drasticamente, entre otro pa motibo di e guera na Ukrania. Hopi hende ta lucha cu e gastonan di comestibel y huur. Mas importante ainda ta e hecho cu e economia ta recuperando bek y cual ta haci cu e exigencia pa reduci salario cu 12.5% no tin mesun peso mas compara cu e aumento di costo di bida. Cu esaki tambe a bira mas dificil pa atrae empleadonan nobo, mientras ta importante pa tin bon empleado. Cu esaki mi kier duna mandatarionan espacio pa riba nan mesun tempo elimina e 12.5%.”
E exigencia mas importante pa elimina e 12.5% di reduccion di salario ta pa segun palabracionnan haci anteriormente, realisa un limite riba salarionan top y e reduccion riba salarionan di politiconan ta keda vigente. E eliminacion di e 12.5% lo wordo discuti durante e rijksministerraad di 25 di mei venidero.
Secretaria di Estado Alexandra van Huffelen pa Relacionnan di Reino lo ta di bishita na e parti Caribense di Reino Hulandes e siman benidero. For di dialuna 23 di mei pa diabierna 27 di mei e lo ta bishitando Aruba, Curacao y Sint Maarten pa topa cu habitantenan, empresarionan, voluntarionan y organisacionnan social, combersando cu nan riba e topiconan di nan metanan y preocupacionnan.