Vincent Storimans ta bira Hefe di Representacion di Hulanda na Oranjestad (VNO)
Despues di cuater aña, David Abrahams ta despidi di Aruba
Oranjestad - David Abrahams ta bay retira como Hefe di Representacion di Hulanda na Oranjestad (VNO) na inicio di juni 2023, y tambe como Representante suplente di Hulanda na Aruba. Na 3 di juli, Vincent Storimans lo tuma su luga.
Despues di casi cuater aña di traha na VNO, Sr. Abrahams y su famia ta bay bolbe na Hulanda y lo keda traha pa Ministerio di Asuntonan Interno y Relacionnan den Reino, caminda Representacion di Hulanda na Aruba ta parti di dje. Dia 1e di augustus, e lo bira Hefe di Departamento di Finansa.
Tocante su periodo na Aruba, Sr. Abrahams a bisa lo siguiente:
"Sin duda ta e puesto mas bunita y interesante den mi carera te cu awor. Ta un satisfaccion di por a yuda supera e crisis di covid. Mi ta sumamente agradecido na mi ekipo fantastico di colega di Representacion di Hulanda na Aruba, sin nan mi no por a desempeña e funcion aki."
Sr. Abrahams lo ser sigui pa Vincent Storimans (43), kende lo inicia su trabou na VNO dia 3 di juli. Sr. Storimans a studia derecho priva Europeo na Universidad di Amsterdam y a traha como diplomat na Embahada Hulandes na Moscou, Beijing y Washington D.C., cu su ultimo funcion como Consul-General suplente na San Francisco. For di 2013 te 2015, e tabata secretario particular di minister di Comersio Exterior y Cooperacion pa Desaroyo, na e momento di Lilianne Ploumen.
"Mi ta warda cu entusiasmo pa por contribui na e relacion importante y amplio entre Aruba y Hulanda. Ademas, mi ta spera cu mi conocemento di diplomacia economico - y ocho aña di experensia laboral na Merca - lo ta di bon uzo", asina Sr. Storimans a bisa.