Secretario di estado Van Huffelen ta bishita Sint Maarten, Saba, Sint Eustatius, Corsou y Aruba
Alexandra van Huffelen, secretario di estado di Relacionnan di Reino y Digitalisacion lo bishita Sint Maarten, Saba, Sint Eustatius, Corsou y Aruba di 29 di juni te cu 4 di juli. Riba 1 di juli e secretario di estado lo asisti na e conmemoracionnan di abolicion di sklabitud riba e tres islanan Sint Maarten, Saba y Sint Eustatius.
Ademas e ta papia cu e prome ministernan y diferente gobernante di e tres paisnan tocante entre otro refinanciamentu di e fiansanan di likides y progreso di e Paketenan di Pais. Na Corsou, Aruba y Sint Maarten elo bishita diferente proyecto cu ta enfoca riba desaroyo economico di e Paisnan.
Sint Maarten
Na Sint Maarten e secretario di estado ta haci apertura di e oficina local di Banco Mundial. Banco Mundial ta administra e ‘trustfonds’ cu e recursonan cu a pone disponibel pa reconstruccion despues di orcan Irma. Ademas e secretario di estado lo bishita e compania di awa y electricidad, GEBE, na Sint Maarten, na unda tin un tarea pa inverti den energia duradero. Riba diasabra 1 di juli e secretario di estado lo asisti na e actividadnan cultural na ocacion di celebracion di Dia di Emansipacion (Emancipation Day). Riba e dia ey Sint Maarten ta conmemora abolicion di sklabitud.
Saba y Sint Eustatius
Riba 1 di juli e secretario di estado lo continua su biahe pa Saba y Sint Eustatius. Riba ambos isla e lo tene un discurso na ocacion di conmemoracion di abolicion di sklabitud. Riba e islanan aki nan ta organisá diferente actividad bou di e nomber di ‘Emancipation day’.
Corsou
Riba 2 di juli Corsou ta celebra su fiesta nacional ‘Dia di Bandera’ y ta organisa actividadnan cultural riba henter e isla. E secretario di estado lo asisti na un parti di e actividadnan aki na entre otro Banda Bou, e parti west di e isla.
Banda di combersacionnan cu diferente mandatario, tin pa Corsou tambe un bishita na e parke di biento flotante (floating wind park) riba agenda. E parke di biento ‘flotante’ off-shore aki, riba termino lo mester genera energia duradero cu lo converti despues den ‘hidrogeno berde’.
Aruba
Na Aruba e secretario di estado lo papia cu Fair Trade Authority tocante e structura pa e outoridat di competencia pa Aruba, cu mester supervisa reglanan di competencia y derecho di consumido. Ademas e secretario di estado lo bishita e sentro di detencion di estranhero y lo papia cu entre otro UNHCR y e minister di husticia arubano.