Sesion di Catshuis organisa den Caribe
Riba 1 y 2 di october ultimo un sesion di Catshuis a tuma lugar na Sint Maarten. E ocasion di e sesion aki tabata pa sigui cu e combersacionnan rondo di e tema di Historia di Sclavitud. Secretario di Estado pa Relacionnan den Reino Alexandra van Huffelen a habri e sesion di Catshuis hunto cu Director-General pa Cultura y Media, Barbera Wolfensberger y cu invitadonan di Corsow, Aruba, Sint Maarten, Boneiro, Saba y Sint Eustatius cu ta traha riba e tema di Historia di Sclavitud a asisti.
Riba diadomingo 1 di october Ministerio di Asuntonan Interior y Relacionnan den Reino hunto cu Ministerio di Educacion, Cultura, y Sciencia a tene un presentacion sigui pa un panel di discusion. Invitadonan tambe a ricibi e oportunidad pa duna un presentacion tocante e progreso riba nan mesun isla riba e topico pa asina intercambia idea, conocimento y stimula colaboracion mas estrecho.
Dialuna 2 di october a duna splicacion mas aleu tocante e Comite di Conmemoracion cu tin cu instala ainda y e Areglo pa iniciativanan social y mehoracion di maneho. Ta trata di un areglo di 200 miyon euro cu a anuncia december pasa pa henter Reino Hulandes y Surnam. E suma aki ta parti den tres parti igual pa Hulanda, Surnam y parti Caribense di Reino, cu ta nifica un maximo di 33 miyon euro pa cada area pa iniciativanan social y 33 miyon euro pa mehoracion di maneho. Despues di esaki a sigui algun sesion di break-out parti merdia den cual invitadonan por a bai mas den detaye tocante topiconan manera archivo, historia oral, Educacion & Cultura y e Comite di Conmemoracion.
E sesion di Catshuis a clausura cu un combersacion entre invitadonan, Secretario di Estado pa Relacionnan den Reino y Director-General pa Cultura y Media.
Di e sesionnan a resulta cu tin un necesidad grandi pa bon colaboracion entre e islanan y comparti conocimento y ‘best practices’.
E sesion di Catshuis di dos dia na Sint Maarten tabata organisa pa Ministerio di Asuntonan Interno y Relacionnan den Reino y Rijksdienst Caribisch Nederland y a conecta cu e simposio di e grupo di trabou Interinsular.