Secretario di Estado Alexandra van Huffelen ta bishita Aruba, Corsou y Sint Maarten
For di 19 te cu 26 di maart 2024 Secretario di Estado Alexandra van Huffelen di Relacionnan den Reino ta realisa un bishita di trabou pa Aruba, Corsou y Sint Maarten. Pa gran parti e bishita aki ta den luz di e Acuerdo Mutuo Colaboracion pa Reformanan. Den e cuadro aki na tur tres pais e Secretario di Estado ta hiba combersacion cu e ministernan presidente y otro ministernan tocante e colaboracion y ehecucion y progreso di e Pakete di Pais. Tambe e mandatario ta papia tocante di e apertura di e Fondo Nacional di Crecemento y e areglo di SDE++ pa e paisnan.
Aruba
E bishita di trabou di Secretario di Estado Van Huffelen ta inicia na Aruba, na unda e mandatario tin un combersacion plania cu prome minister Evelyn Wever-Croes tocante di e Acuerdo Mutuo Colaboracion pa Reformanan y e fondonan di invercion. Tambe tin un combersacion cu minister Xiomara Maduro di Financia tocante di impuesto riba e programa y e Secretario di Estado ta haña presentacion cu ta trata e reorganisacion di gobierno, e combenio di cuido y enseñansa. Mas aleu e mandatario tin un encuentro informal cu e lidernan local di proyectonan di e Pakete di Pais.
Corsou
Riba 21 di maart e Secretario di Estado ta biaha pa Corsou, na unda e ta combersa cu prome minister Gilmar Pisas tocante e Acuerdo Mutuo Colaboracion pa Reformanan y e fondonan di invercion. Tambe e mandatario ta papia cu minister Larmonie-Cecilia di Desaroyo Social, Labor y Bienestar, Van Heydoorn di Enseñansa, Sciencia, Cultura y Deporte, Silvania di Financia y Martina di Maneho di Gobernacion, Planificacion y Servicio Publico tocante e proyektonan di e Pakete di Pais. Cu prome minister Pisas y minister Cijntje di Desaroyo Economico e Secretario di Estado ta papia tocante di refineria y tambe e mandatario ta bishita dos scol cu a renoba cu recursonan financiero di Hulanda.
Por ultimo e Secretario di Estado ta participa na e conferencia legislativo di Caribe, cu e cuater paisnan a organisa conhuntamente y tambe e tin un encuentro cu empresarionan y e sociedad civil di Corsou.
Sint Maarten
E programa na Sint Maarten ta inicia riba dialuna 25 di maart; riba e dia aki e Secretario di Estado ta papia cu prome minister demisionario Silveria Jacobs tocante di e colaboracion relaciona cu e Acuerdo Mutuo Colaboracion pa Reformanan y e apertura di e fondonan di invercion. Tambe e mandatario tin un lunch pa tuma despedida di e gabinete demisionario di Sint Maarten y e ta sera conoci cu e lidernan di fraccion nobo. Tambe riba agenda tin un bishita na e University of Sint Martin y un sesion cu un grupo di enfoke di hobennan profecional tocante di cambio di clima.
Riba diamars 26 di maart 2024 Secretario di Estado Van Huffelen ta biaha bek pa Hulanda.