Un areglo di subsidio pa iniciativanan social cu ta facilmente accesibel. Cambio di nomber gratis pa descendientenan di esclabo biba na Hulanda Europeo y Hulanda Caribense. Mas atencion na prevencion di discriminacion y racismo. Invercion den herencia cultural. I ampliamento di conocemento di e manera cu Historia di Sclavitud tin impacto te cu awor. Esaki ta algun di e pasonan concreto cu gabinete Hulandes a tuma despues di e desculpa di Gabinete pa e Historia di Sclavitud. E manera cu e asina yamá ‘espacio tras di e coma’ ta keda yená, ta un proceso cauteloso cu ta tuma lugar cu envolvimento activo di descendientenan. Esaki ta para den e carta di progreso tocante e programa di Historia di Sclavitud cu gabinete Hulandes a manda awe pa parlamento.
Areglo di subsidio basa riba dialogo
Pa envolve e descendiente y otro personanan concerni den tur fase di e proceso, durante e ultimo seis lunanan, entre otro, a tene reunionnan na Sint Maarten y Den Haag.
Durante sesionnan di dialogo na Hulanda Europeo, a papia cu 270 descendiente den henter e pais y tambe online, tocante conmemoracion di Historia di Sclavitud y tocante nan ideanan pa iniciativanan social. E resultadonan di e sesionnan di dialogo ta para den un rapport final.
Resultado di e sesionnan di dialogo tambe ta forma parti di e areglo di subsidio pa iniciativanan social pa Hulanda Europeo. E subsidio mester ta facilmente accesibel pa organisacionnan, pa evita cu organisacionnan ta keda pega den trayectonan di peticion compleho.
Den e investigacion a sali na cla cu e personanan ta haya importante cu iniciativanan social mester ofrece un solucion pa combati desigualdad structural. Pa e areglo di subsidio Gabinete Hulandes a reserva €100 miyon. E suma ta dividi den tres parti: €33,3 miyon pa Hulanda Europeo, €33,3 miyon pa e parti Caribense di Reino, y €33,3 miyon pa Sürnam.
E consulta di e areglo di subsidio aki pa tanto e parti Europeo y Caribense di Reino, a terminá. E prome peticionnan por wòrdu hasí den herfst akí.
Cambio di nomber, investigacion di Historia di Sclavitud y lucha contra discriminacion
Ademas, e gabinete ta pone €100 miyon disponibel pa otro medidanan riba conscientisacion y reconocemento, conocemento y efecto y e procesamento di e efectonan di e Historia di Sclavitud. E fondonan aki tambe ta dividi igualmente entre e tres regionnan.
Ta reserva €14,9 miyon pa un areglo cu ta permiti descendientenan cambia nan fam gratis for di 1 di juli 2024. E meta ta pa fo’i 1 di januari 2025 esaki tambe ta posibel pa descendientenan cu ta biba na Boneiro, Saba y Sint Eustatius. Riba 19 di december 2022 e gabinete a declara cu e ta bai haci mas esfuerso pa combati discriminacion y racismo. €1.7 miyon ta keda disponibel pa comunicacion publico amplio pa combati discriminacion y racismo.
Tambe ta mehora acceso na facilidadnan pa anti-discriminacion. A base di datonan, conocemento y investigacion disponibel, ta trata di haya un mihor comprencion di ki manera Historia di Sclavitud ta conduci na discriminacion y racismo den sociedad di awendia. Pa e investigacion aki Gabinete ta pone €3,8 miyon disponibel. Ademas, via e 'Leernetwerk Slavernijverleden ' ta yuda municipionan na Hulanda pa duna contenido na e efectonan di e Historia di Sclavitud den nan propio contexto local. Esaki ta encera €1,1 miyon.
Banda di esaki, lo tin un programa di investigacion di varios aña riba e forma cu Historia di Sclavitud tin impacto te cu awendia (€1,7 miyon).
E museo nacional di sclavitud lo ricibi €3 miyon pa un centro di conocemento pa fortifica su funcion di conocemento i networking na nivel di Reino e internacional y pa haci acceso digital na e museo posibel.
Ademas di esaki, €4,5 miyon ta disponibel pa inverti den conservacion y desaroyo di museo, archivo y proteccion di patrimonio cultural.
E Historia di Sclavitud tambe tin efecto riba salud (mental) y bienestar di descendientenan. Esaki ta evidencia dor di combersacionnan cu descendientenan. E gabinete ta pone €1,7 miyon disponibel pa intervencionnan cu mester prevení efectonan negativo riba salud di descendientenan. Alumnonan ya caba ta siña tocante e Historia di Sclavitud den enseñansa primario y secundario y tambe den e curiculo nobo esaki lo haya su lugar.
Ademas, e gabinete ta inicia accionnan pa duna e Historia di Sclavitud un posicion mas prominente den enseñansa primario y secundario (€0,8 miyon). Pa e partinan Caribense di Reino, e islanan ta traha riba e asina yama 'herstelagenda'. Cu ta basa riba prioridadnan di cada pais/isla y e compromisonan existente. Ehempel di e compromisonan aki ta rehabilitacion di Tula, acceso digital na archivo y actualisacion di metodonan di enseñansa. Sürnam ta plania di crea un plataforma den cua algun representante di e gruponan mas interesa lo participa pa tene un dialogo tocante e montanenan cu tin disponibel.
Aña di conmemoracion y comite di conmemoracion
Durante e Aña di Conmemoracion (1 di juli 2023 te cu 1 di juli 2024) ya a sostene 200 proyecto den Hulanda Oropeo y e parti Caribense di Reino. Ta trata di proyectonan di arte visual, patrimonio, arte teatral y literatura, pero tambe podcast, dialogo, sesionnan di safe space, workshop, conmemoracion y celebracion.
Te ainda a sobra €1.6 miyon pa proyectonan for di e Fondo di Participacion Cultural. Organisacionnan ainda por haci peticion pa esaki. E fondo a nombra exploradornan den e parti Caribense di Reino pa yuda cu entrega peticionnan pa proyecto.
E aña di Conmemoracion di Sclavitud ta yega su final dia 1 di juli 2024, pero e conmemoracion y atencion pa e Historia di Sclavitud ta keda. Durante e periodo cu ta bini, e gabinete ta sigui dialoga cu NiNsee y otro organisacionnan cu ta ocupa cu conmemoracion den Reino y Sürnam pa yega na un Comite di Conmemoracion pa Historia di Sclavitud. Pa esaki gabinete a reserva €8 miyon pa aña. E meta ta pa prome cu 1 di juli 2024 por duna encargo na e comite y e presidente di e comite. E comite lo cuminsa mas tarda den herfst aki.