Preparacion pa crisis den e partinan Caribense di Reino
Di 21 te cu 24 di mei a tuma luga na Den Haag e di tres edicion di e ‘Siman di Maneho di Crisis den e partinan Caribense di Reino’. Ministerio di Asuntonan Interno y Relacionnan den Reino y ministerio di Husticia y Siguridad a organisa e siman. Diferente representante di organisacionnan di crisis di e 6 islanan Aruba, Boneiru, Corsou, Sint Maarten, Saba y Sint Eustatius, colaborado di diferente ministerio y partner di cadena manera ‘Landelijk Operationeel Coördinatie Centrum’ (LOCC) y ‘Urban Search and Rescue Team’ (USAR.NL) a bini hunto.
E siman a cuminsa cu un ehercicio di dilema, den cua participantenan mester a practica cu tomo di decisionnan dificil. Despues tabatin presentacion- y discucionnan interesante tocante maneho di crisis. Tambe a haci un bishita di trabou na LOCC y ‘Koninklijk Nederlands Meteorologisch Instituut’ (KNMI). LOCC ta forma parti di ministerio di Husticia y Siguridad y ta eherce un papel importante entre otro den caso di incidente, desaster y crisis (inter)nacional of den caso cu tin menasa cu esakinan por tuma luga. KNMI ta entre otro responsabel pa traha imagennan di tempo, pa Hulanda Caribense tambe.
E participantenan a haya importante cu durante e Siman di Maneho di Crisis nan por a intercambia conocemento, explora mas profundo e posibilidadnan pa colaboracion y haci palabracionnan tocante esaki y pa tin contacto cu representantenan di otro organisacionnan di crisis. Colaboracion y preparacion tabata central henter e siman. Colaboracion ta importante, sigur den tempo di crisis. Ora un desaster of crisis presenta, ta importante pa ta prepara. Un bon preparacion ta conduci na un miho maneho di crisis. E participantenan ta mira bek riba un Siman di Maneho di Crisis exitoso.